“Daryo” internet-nashri www.uz Milliy qidiruv tizimi tomonidan tuzib boriladigan O‘zbekiston saytlari reytingida 2015-yil 17-iyul kuni yakunlariga ko‘ra birinchi o‘ringa ko‘tarildi. Bungacha peshqadamlikni UFF.uz sayti egallab kelayotgan edi.
Sayt reytingning “Yangiliklar va ommaviy axborot vositalari” yo‘nalishida shu paytgacha ham birinchi o‘rinda edi. Endi esa umumiy reytingda ham birinchilik zabt etildi.
“Siz mushtariylar uchun eng qiziqarli va muhim yangiliklarni tezkorlik bilan yetkazishda davom etamiz”, — dedi nashr bosh muharriri Alisher Azimov. “O‘zbekistondagi eng ommabop sayt nomini qo‘lga kiritish bizga katta quvonch bilan birga ulkan mas’uliyat yuklaydi”, — deya qo‘shimcha qildi loyiha rahbari Farhod Fayzullayev.
Bunday cho‘qqini siz aziz mushtariylarimiz yordamisiz egallay olmas edik. Sizga tashakkur aytishdan to‘xtamaymiz!
Milliy qidiruv tizimi ro‘yxatdan o‘tgan saytlarga tashrif buyurgan foydalanuvchilar soniga qarab kundalik reytingni tuzadi. Reytingda saytlarning joylashuvi ularning avvalgi kundagi ommabopligiga ko‘ra o‘zgarib turadi.Eslatib o‘tamiz, iyun oyida “Daryo”ga 570 000, yil boshidan buyon esa 2 milliondan ortiq kishi tashrif buyurgan.
Izoh (0)