Taniqli bloger rossiyalik tadbirkorlar orasida Alisher Usmonov alohida ajralib turishini e’tirof etdi

LiveJournal blog platformasidagi eng ommabop bloglardan bo‘lgan miss-tramel blogi muallifi, Lena Miro taxallusi bilan ijod qiluvchi aktrisa, yozuvchi, ssenarist Yelena Mironenko asli o‘zbekistonlik milliarder Alisher Usmonov rossiyalik tadbirkorlar orasida alohida ajralib turishini e’tirof etdi.

Uning so‘zlariga ko‘ra, Alisher Usmonov boshqa milliarderlardan kuchli farq qiladi. “Jumladan, Londonga ketib qolganlar va bank sohasida ishlayotganlardan farqli ravishda u Rossiyada qolib, real ishlab chiqarishga, xususan metallurgiya sanoatiga investitsiya kiritgani alohida tahsinga sazovor”, — deb yozadi bloger.

Shuningdek, Usmonovning Rossiya terma jamoasi bosh murabbiyi Fabio Kapelloga Rossiya futbol ittifoqining qarzini to‘lab bergani, rafiqasi Irina Vinerning tashabbusi bilan Moskva yaqinida qurilayotgan badiiy gimnastikachilar uchun Olimpiya qishlog‘i qurilishini moliyalashtirayotganini ham e’tirof etgan.

Bundan tashqari, Usmonovning rossiyalik milliarderlar orasida eng saxovatpesha deb topilgani, uning xayriya faoliyati, jumladan, DNK ixtirochisi Jeyms Uotsonning Nobel medalini kimoshdi savdosida sotib olib, uni olimning o‘ziga qaytarib bergani ham blogerning e’tiboridan chetda qolmagan.