Nestle 50 million dollarlik Maggi lag‘monlarini yo‘q qiladi

Shveysariyaning Nestle kompaniyasi Hindiston oziq-ovqat xavfsizligi talablarini buzgani uchun umumiy qiymati 50 million dollar bo‘lgan tez tayyorlanadigan Maggi lag‘monlarini yo‘q qiladi. Bu haqda Nur.kz xabar bermoqda.

Ayni vaqtda, kompaniya vakillari lag‘monlar mutlaqo xavfsiz ekanligini ma’lum qilib, kompaniyaga qarshi ilgari surilgan ayblovlarni rad etmoqda. Maggi Hindiston tez tayyorlanadigan taom mahsulotlari bozorining 80 foizini egallagan.

Bundan tashqari, Nestle xarajatlarining yakuniy miqdori yanada oshishi mumkin, chunki kompaniya mahsulotni yo‘q qilish joyiga yetkazib olib borish uchun ham qo‘shimcha mablag‘ sarflashi kerak.

Hindiston hukumati lag‘monning ba’zi qadoqlarida qo‘rg‘oshin miqdori belgilangan talablardan yuqori ekanligi sabab Maggi savdosini taqiqlab qo‘ydi. Nestle ushbu qaror ustidan sudga shikoyat qilishini va mashhur lag‘monni do‘konlarga qaytarishga tayyor ekanligini bildirdi.