Asli o‘zbekistonlik xonanda Nargiz Zokirova Instagram sahifasida tanqidli izohlar qoldirgan o‘zbekistonlik foydalanuvchilarga qarata javob yozdi.
“Joningizga tegmadimi,a??? Tinch qo‘ysangiz-chi, men sizga o‘xshaganlardan qochib ketganimga, O‘zbekiston deb atalmish jahannamdan aynan qochib ketganimga 20 yildan oshdi. Haligacha o‘sha yerda yashaydigan qarindoshlarim zarariga! Men ularni ko‘rmayman, ularni judayam sog‘inaman, lekin siz kabi razil, jirkanch nodonlar va riyokorlar tufayli o‘z vatanimni tark etishga majbur bo‘ldim! Nafaqat meni, balki mening taniqli sulolamni hurmatlash u yoqda tursin, yerga urib, o‘zlarining ayanchli darajalariga tortib tushirmoqchi bo‘lgan vatanimni! Bu sulolani yer bilan yakson qilish emas, u bilan faxrlanishingiz kerak edi! Men bobom, buvim, tog‘alarim, otam O‘zbekiston madaniyati taraqqiyotiga juda katta hissa qo‘shganidan faxrlanaman. O‘z familiyam ostida iftixor bilan yuraman!!! Va shuni bilishingizni istardimki, bu qanchalik beadabona va qo‘pol yangramasin, meni la’natlashga va menga qarata juda xunuk va jirkanch izohlar yozishga qo‘li boradiganlar tufayli O‘zbekistonni o‘z hayotimdan tag-tomiri bilan uzib olishimdan uyalaman ham! Men sizning, ha, ha aynan sizning respublikangizdan chiqqanligimni unuting! Men sizniki emasman! Va hech qachon bo‘lmaganman. Na e’tiqodim, na qiyofam, na ruhim, na qalbim bilan! Men erkin odamman! Mening Vatanim bu AQSh, Rossiya, Dog‘iston, Hindiston, Xitoy… Ishqilib, har qanday joy, lekin siz emassiz!!! Meni va oilamni o‘z holiga qo‘ying, yolvoraman!!! Va xudo haqqi, sahifamdan keting, sizlarda aytiladigandek, “shayton”dan nari yuring! Bu yer siz kabi “e’tiqodlilar” uchun emas!!!” — deyiladi san’atkorning izohida.
Nargiz Zokirova 1971-yil Toshkentda san’atkorlar oilasida tug‘ilgan. U taniqli opera qo‘shiqchisi, teatr va kino aktyori, O‘zbekiston xalq artisti Karim Zokirovning nabirasi. Nargiz 14 yoshida Yurmaladagi qo‘shiqlar tanlovida qatnashgan. 90-yillarda o‘zbek estradasida ijod qila boshlagan. 1995-yilda AQShga ko‘chib ketgan va oradan 20 yil o‘tib, 42 yoshida Rossiya sahnasida ko‘rinish berdi.
Nargiz Zokirovaga u “Golos” teletanlovi sahnasiga chiqqan ilk daqiqalardan boshlab ko‘pchilik qiziqish bildirdi. Bunga sabab xonandaning tashqi ko‘rinishi, noodatiy imidji, deyish mumkin. U noan’anaviy soch turmagi, bosh va qo‘llarida tatuirovkalar, turli taqinchoqlar bilan mutlaqo “o‘zbekcha” bo‘lmagan ko‘rinishda sahnaga chiqdi.
Izoh (0)