BMT Bosh kotibi Pan Gi Mun Eron va xalqaro vositachilar “oltiligi” (AQSh, Rossiya, Buyuk Britaniya, Fransiya, Xitoy va Germaniya)ni Tehron yadro dasturi bo‘yicha muzokaralar muvaffaqiyatli yakunlangani bilan tabrikladi, deya xabar bermoqda BMT matbuot xizmati.
“Yadro dasturi bo‘yicha keng qamrovli bitim Erondan barcha sanksiyalarni olib tashlash imkonini beradi, — dedi Pan Gi Mun. — U Eron ehtiyojlari va huquqlarini himoya qiladi, shu bilan birga, xalqaro jamoatchilik uchun uning yadro dasturi faqat tinchlik xususiyatiga ega bo‘lishini kafolatlaydi”.
Eslatib o‘tamiz, 2-aprel kuni Eron va xalqaro vositachilar “oltiligi” Eron yadro dasturi bo‘yicha siyosiy kelishuvga erishdi. Bitimni tayyorlash jarayoni 30-iyungacha yakunlanadi. AQSh Davlat departamenti bayonotida aytilishicha, Eron yadro dasturi ustidan nazorat turli yo‘nalishlar bo‘yicha 10 yildan 25 yilgacha davom etadi.
Izoh (0)