O‘zbekiston Respublikasi Vazirlar Mahkamasi Gidrometeorologiya xizmati markazi ma’lumotiga ko‘ra, shu kunlarda O‘zbekistonda kuzatilayotgan qorli va sovuq havo harorati hafta oxirigacha ko‘tarilishi kutilmoqda.

Jumladan, 1−2-aprel kunlari Qoraqalpog‘iston Respublikasi, Xorazm, Buxoro, Navoiy, Samarqand, Jizzax, Sirdaryo va Toshkent viloyatlarida kechasi 0−5° iliq, ba’zi joylarda 2° sovuqgacha, kunduzi 5−10° iliq, Qashqadaryo va Surxondaryo viloyatlarida kechasi 3−8° iliq, kunduzi 7−12° iliq (2-aprelda 15−20° iliq), Andijon, Namangan va Farg‘ona viloyatlarida kechasi 2° sovuq − 3° iliq, kunduzi 3−8° iliq bo‘ladi. Ba’zi joylarda yomg‘ir yog‘adi.

3−5-aprel kunlari Qoraqalpog‘iston Respublikasi, Xorazm, Buxoro, Navoiy, Samarqand, Jizzax, Sirdaryo va Toshkent viloyatlarida kechasi 3−8° iliq, kunduzi 13−20° iliq, Qashqadaryo va Surxondayo viloyatlarida kechasi 6-11° iliq, kunduzi 18-23° iliq, Farg‘ona vodiysida kechasi 3−8° iliq, kunduzi 13−18° iliq bo‘ladi.

Respublikaning tog‘li hududlarida 2−4-aprelda vaqti-vaqti bilan yog‘ingarchilik (yomg‘ir, qor) bo‘ladi, 5-aprelda yog‘ingarchilik kutilmaydi. Qor ko‘chishi xavfi bor. Ba’zi joylarga tuman tushishi mumkin. G‘arbiy shamol yo‘nalishini o‘zgartirib, sharqdan 7−12 m/s tezlikda esadi, 2-aprelda ba’zi joylarda 15−20 m/s gacha kuchayishi mumkin. Harorat 2-aprelda kechasi 0−5° sovuq, kunduzi 2−7° iliq bo‘ladi, 3−5-aprelda kechasi 2° sovuq − 3° iliqgacha, kunduzi 5−10° iliqgacha ko‘tariladi.