Turkiyaning Manisa viloyatida politsiya ikki kishini qo‘lga olib, tintuv vaqtida ularning yonida 1 million dollarlik kupyura topdi, deb xabar bermoqda “Rossiyskaya gazeta”.

Qalbaki pul yasovchilarni topish bo‘yicha operatsiya o‘tkazgan politsiya avtomobillardan birida soxta AQSh dollarlarining katta partiyasi olib o‘tilishi haqida xabar topgach, hibsga olish operatsiyasini boshladi. Biroq tintuv vaqtida soxta pullar topilmagan, aksincha, jildlardan birida haqiqiylik sertifikatiga ega million dollarlik kupyura topilgan.

Banknota musodara qilingan, u Turkiya Markaziy bankiga topshirilgani taxmin qilinmoqda. Gumonlanuvchilar uni qayerdan olib qayerga ketayotganini tushuntirib bera olmagan. Kupyura kontrabanda yo‘li bilan Istanbuldagi shaxsiy kolleksionerlardan biri uchun olib ketilayotgani taxmin qilingan.

Ma’lumot uchun, million dollarlik kupyura AQShda 1988-yilda chiqarilgan bo‘lib, rasmiy pul birligi sifatida qabul qilinmagan bo‘lsa-da, katta qiymatga ega. Kolleksionerlar bunday noyob banknotalar uchun yuz minglab dollar to‘lashga tayyor.