Rustam Qosimjonov Gruziyadagi FIDE Gran-prisida yana bir bor durang qayd etdi
Gruziya poytaxti Tbilisi shahrida shaxmat bo‘yicha FIDE Gran-prisining uchinchi bosqichi davom etmoqda. Sayyoraning eng kuchli grossmeysterlari ishtirokida o‘tayotgan nufuzli musobaqada 2004-yilgi jahon chempioni Rustam Qosimjonov ham ishtirok etmoqda, deb xabar beradi Olamsport.com.
Kecha, 18-fevral kuni o‘tkazilgan 4-tur uchrashuvida Qosimjonov qora donalarda kubalik Lenyer Dominges bilan munosabatlariga oydinlik kiritib oldi. Tomonlar 31-yurishdan so‘ng durangga imzo chekdi. E’tiborlisi, Dominges o‘tkazgan to‘rttala partiyasida ham raqiblari bilan murosaga kelgan.
Mazkur durangdan so‘ng, Rustam Qosimjonov 2 ochko bilan turnir jadvalida 6-o‘rinni egallab turibdi. Uch yarim ochkoga ega rossiyalik Yevgeniy Tomashevskiy hamon yakka peshqadamlik qilyapti.
FIDE Gran-prisi (3-bosqich, 4-tur)
- Teymur Rajabov (Ozarbayjon) – Dmitriy Yakovenko (Rossiya) – 0,5:0,5
- Aleksandr Grishchuk (Rossiya) – Baadur Jobava (Gruziya) – 1:0
- Shaxriyar Mamadiyarov (Ozarbayjon) – Yevgeniy Tomashevskiy (Rossiya) – 0:1
- Anish Giri (Gollandiya) – Dmitriy Andreykin (Rossiya) – 0,5:0,5
- Lenyer Dominges (Kuba) – Rustam Qosimjonov (O‘zbekiston) – 0,5:0,5
- Pyotr Svidler (Rossiya) – Maksim Vashye-Lagrav (Fransiya) – 0,5:0,5
- Tomashevskiy – 3,5
- Grishchuk, Yakovenko, Giri – 2,5
- Mamadiyarov, Qosimjonov , Dominges, Rajabov – 2
- Andreykin, Vashye-Lagrav, Svidler – 1,5, Jobava – 0,5
