Moskvada musulmonlar ko‘chma masjid uchun mablag‘ to‘plashni boshladi

Musulmonlar tashabbuskor guruhi Moskva ko‘chalarida ko‘chma masjidni harakatlantirish loyihasini amalga oshirish uchun kerak bo‘ladgian 1 million rubl miqdoridagi mablag‘ni yig‘ishni boshladi, deb xabar bermoqda “TASS”.

Masjid tahorat uchun alohida xona va kichik ibodat zalini o‘z ichiga oluvchi tirkamada bo‘ladi. Shuningdek, tirkamada oziq-ovqat mahsulotlarini sotuvchi avtomat ham joylashtiriladi, unga tushgan mablag‘ hisobidan ko‘chma masjid xarajatlarini qoplash ko‘zda tutilgan.

Masjid xizmatlari bepul bo‘ladi: buning uchun saytda tegishli arizani qoldirish kifoya qiladi, ko‘chma masjid aytilgan joyga yetib boradi. Tashkilotchilar bu orqali zamonaviy shahardagi tig‘izlik va masjidlar sig‘imi kamligi sharoitida musulmonlarga o‘z vaqtida namoz o‘qish imkonini yaratishni rejalashtirgan. Ikkita ko‘chma masjiddan tashqari, ertalab aytilgan joyga borib, kechgacha qoladigan oltita turg‘un masjid yo‘lga qo‘yilishi ham ko‘zda tutilmoqda.

Qayd etilishicha, Rossiya poytaxtida hozirda oltita masjid faoliyat ko‘rsatmoqda.