Google barcha turdagi qurilmalarda ommaboplik bo‘yicha “Yandeks”ni ortda qoldirdi

Foydalanuvchilar bo‘yicha raqobatda Google “Yandeks”ni ortda qoldirmoqda, deya xabar berdi “Vedomosti.ru” Morgan Stanley tahlilchilariga tayanib. Bank ekspertlari 2012—2014-yillarda olib borilgan tadqiqotlar natijasida bunday xulosaga keldi.

Ma’lum bo‘lishicha, Google avvalambor, mobil qurilmalar va dasturlar foydalanuvchilari orasida ommabopdir. Bunda kompaniyaga mobil qurilmalar uchun o‘z operatsion tizimi — Android borligi yordam beradi. Rossiyadagi smartfonlarning 70 foizdan oshig‘i Android’da ishlaydi.

“Yandeks”ning obro‘si shaxsiy kompyuter foydalanuvchilari orasida katta bo‘lganiga qaramay, hozirda ular ham Google’ni afzal ko‘rmoqda — bundaylar 83 foizni tashkil etdi. Balki bunda Google’ning Chrome internet-brauzeri rolda o‘ynamoqdadir, deya taxmin etiladi hisobotda.