Avstraliyaning Sidney shahridagi “ANZ” stadionida maydon egalari va Janubiy Koreya terma jamoasi o‘rtasidagi final uchrashuvi o‘z yakuniga yetdi. Unda “sokkeruz”lar qo‘shimcha taymlarda kiritilgan gol evaziga g‘alaba qozonib, bosh sovringa ega chiqdi, deb xabar bermoqda “Uff.uz”.
O‘yinni har ikki terma jamoa juda ehtiyotkorlik bilan boshladi. Janubiy Koreya ham, Avstraliya ham to‘liq hujumga o‘tib ketmay, vaziyat bo‘lishini ancha vaqt poyladi. Asosan, pozitsion hujum tashkil qilib, raqibni jazolashga harakat qilishdi.
Birinchi bo‘lim durang bilan yakunlanadigandek tuyulgan bir vaziyatda Avstraliya terma jamoasi yarim himoyachisi Luongo kutilmaganda uzoqdan zarba yo‘llab, hisobni ochdi.
Ikkinchi bo‘lim koreyaliklarning hujumlari bilan boshlandi. Ammo avstraliyalik himoyachilar faol harakat qilib, ularning bu hujumlarini bartaraf etib turdi.
Uchrashuv yakuniga yetgan sari barcha Avstraliya terma jamoasining g‘alabasiga ishonib turgandi. Ammo Janubiy Koreya hujumchisi Son Xyon Ming bunga rozi bo‘lmadi. U hakam tomonidan qo‘shib berilgan daqiqalarda ajoyib harakat qilib, Avstraliya termasi darvozabonini ojiz qoldirib, hisobni tenglashtirdi. O‘yin qo‘shimcha taymlarda davom etdi.
1-qo‘shimcha taymning oxirlariga kelib, Avstraliya Koreyaning himoyadagi qo‘pol xatosidan foydalanib, hisobda oldinga chiqib oldi: Jeyms Troisi Yulichning o‘ng qanotdan oshirib bergan uzatmasini golga aylantira oldi.
Qo‘shimcha ikkinchi taymda hisob o‘zgarmay qoldi. Shu tariqa, Avstraliya terma jamoasi o‘z maydonida o‘tgan Osiyo Kubogida g‘alaba qozonib, o‘z tarixida ilk marta qit’aning bosh sovriniga ega chiqdi.
Osiyo Kubogi, final
Janubiy Koreya — Avstraliya: 1:2
Gol: Son Xyon Min (90+2) — Luongo (45), Troisi (105).
Janubiy Koreya: Kim Chjin Xen, Chjan Xen Su, Kim Yen Gvon, Pak Chju Xo (An Guk Yen, 71), Cha Du Ri, Son Xin Min, Nam Txe Xi (Li Gin Xo, 63), Kim Chjin Su, Ki Son Yen, Kvak Txe Xvi, Li Chjon Xep.
Avstraliya: Rayan, Seynsberi, Shpiranovich, Devidson, Milligan, Yedinak, Keyxill (Yurich, 63), Luongo, Kruz (Troisi, 71), Franyich (Makkey, 74), Lekki.
Izoh (0)