NASA: 2004 BL86 asteroidi yanvar oxirida Yerga yaqin keladi
Diametri 500 metr, og‘irligi 157 million tonnaga teng 2004 BL86 asteroidi 26-yanvar kuni Yerga yaqin keladi, deya xabar bermoqda “RIA Novosti”. U sayyoramizga Oydan Yergacha bo‘lgan masofaning uch baravariga teng masofada yaqinlashadi va u uchun hech qanday xavf tug‘dirmaydi.
NASAning reaktiv harakat laboratoriyasi xodimi Don Yeomans aytishicha, ushbu asteroid so‘nggi 200 yil ichida sayyoramizga bunchalik yaqin kelmagan. Shunday yaqin masofada uchib o‘tishi uni kuzatib, yuzasini o‘rganish imkoniyatini beradi.
“NASA asteroidga mikroto‘lqinli nur bilan ta’sir etib, uning yuqori aniqlikdagi 3D suratlari va 3D-modelini olmoqchi”, — dedi u. Astronomlar bugungi kunda ushbu osmon jismi tuzilishi va ko‘rinishi to‘g‘risida deyarli hech qanday ma’lumotga ega emas.
