Xotamjon Ketmonov Xalq demokratik partiyasidan O‘zbekiston Prezidentligiga nomzod sifatida ko‘rsatildi
2015-yilning 15-yanvar kuni O‘zbekiston Xalq demokratik partiyasi Markaziy Kengashining navbatdagi II plenumi bo‘lib o‘tdi. Bu haqda O‘zbekiston XDP Markaziy Kengashi Matbuot xizmati xabar berdi.
Unda O‘zbekiston XDP Markaziy Kengashi a’zolari, mas’ul xodimlari, O‘zbekiston Respublikasi Oliy Majlisi Qonunchilik palatasidagi partiya fraksiyasi a’zolari, mintaqaviy partiya kengashlari rahbarlari, partiya faollari hamda OAV vakillari ishtirok etdi.
Plenum kun tartibiga O‘zbekiston Respublikasi Prezidenti saylovida partiyaning munosib ishtirokini ta’minlash borasidagi vazifalar, O‘zbekiston Xalq demokratik partiyasidan O‘zbekiston Respublikasi Prezidentligiga bo‘lak nomzod ko‘rsatish, partiyaning O‘zbekiston Respublikasi saylovlarida ishtirokini qo‘llab-quvvatlovchi saylovchilarning imzolarini yig‘ishni tashkil etish, O‘zbekiston XDPning IX qurultoyini chaqirish va uning kun tartibi, partiya qurultoyiga vakillik me’yori va ularni saylash tartibi kabi masalalar kiritildi.
Plenumda O‘zbekiston XDP Markaziy Kengashi raisi Xotamjon Ketmonov ma’ruza qildi.
Partiya yetakchisi Xotamjon Ketmonov tomonidan yurtimizda amalga oshirilgan demokratik islohotlar natijasida siyosiy partiyalar uchun yaratib berilgan teng huquq va imkoniyatlardan to‘la foydalangan holda partiya elektorati hamda dasturiy maqsad va g‘oyalardan kelib chiqib, joriy yilgi O‘zbekiston Respublikasi Prezidentligiga bo‘lib o‘tadigan saylovda partiyaning munosib ishtirokini ta’minlash borasidagi vazifalarga alohida e’tibor qaratildi.
Xususan, barcha saylov uchastkalarini partiyadan ko‘rsatiladigan nomzodning saylovoldi dasturi va qonunda ko‘zda tutilgan boshqa adabiyotlar bilan ta’minlash, saylovoldi targ‘iboti davrida partiya tashkilotlarining faol ishtirokini yo‘lga qo‘yish, ayniqsa, aholining yurtimizdagi mazkur muhim siyosiy jarayonlardan xabardorligini oshirishga qaratilgan targ‘ibot tadbirlarining sifati, samaradorligiga e’tibor qaratish, vakolatli vakil, kuzatuvchi va ishonchli vakillarni tanlash kabi bir qator muhim masalalar yuzasidan tavsiyalar berildi.
Kun tartibidagi navbatdagi masala – O‘zbekiston Xalq demokratik partiyasidan O‘zbekiston Respublikasi Prezidentligiga nomzod ko‘rsatish masalasi ham alohida muhokama qilindi.
Bu borada partiya elektorati, tarafdor va faollari tomonidan tavsiya etilgan O‘zXDP Markaziy Kengashi raisi, partiya fraksiyasi rahbari Xotamjon Abdurahmonovich Ketmonov partiyadan O‘zbekiston Respublikasi Prezidentligiga nomzod sifatida ko‘rsatildi.
Shuningdek, ishtirokchilar partiyaning O‘zbekiston Respublikasi saylovlarida ishtirokini qo‘llab-quvvatlovchi saylovchilarning imzolarini yig‘ishni tashkil etish masalasiga ham alohida e’tibor qaratdilar. Mazkur jarayonda partiya tashkilotlari hamda deputatlik guruhlarining o‘zaro hamkorlikdagi faoliyatini tashkil etish, bu boradagi qonunchilik talablariga to‘liq rioya qilish masalalari xususida fikrlar bildirildi.
Shuningdek, Plenumda O‘zbekiston XDPning IX qurultoyini chaqirish va uning kun tartibi hamda partiya qurultoyiga vakillik me’yori va ularni saylash tartibi kabi masalalar ham atroflicha muhokama qilindi.
Kun tartibidagi masalalar bo‘yicha partiyaviy OAV va hududiy partiya kengashlari rahbarlari oldiga tegishli vazifalar qo‘yildi. Shu bilan birga, partiyaning saylov kampaniyasini samarali o‘tkazishini ta’minlash borasida bir qator tashkiliy va mafkuraviy vazifalar belgilandi.
Muhokama qilingan barcha masalalar yuzasidan O‘zXDP Markaziy Kengashi II plenumi tegishli qarorlarni qabul qildi.
