6,3 mm qalinlikdagi Samsung Galaxy A7 smartfoni rasman taqdim etildi

Samsung kompaniyasi avvalroq Malayziyada Galaxy A3 va Galaxy A5 modellari taqdimotida namoyish etilgan Galaxy A7 smartfonini rasman taqdim etdi. Bu haqda 3dnews.ru xabar berdi.

Qurilma Samsung chiqarayotgan smartfonlar ichida eng ingichka — 6,3 millimetr korpusga ega. Taqqoslash uchun, Galaxy S5 qalinligi 8,1 mm, iPhone 6’niki esa 6,9 mm ga teng.

Samsung Galaxy A7 ikki xil: Qualcomm Snapdragon 615 64 bitli tizim va Exynos 5430 32 bitli tizimlarga ega versiyalarda chiqariladi. Har ikkala chipset ham sakkiz yadroli protsessorlar bilan jihozlangan.

Versiyalarning har ikkalasi ham 2 Gb tezkor va 16 Gb ichki xotiraga ega.

Samsung Galaxy A7 5,5 dyuymli Super AMOLED displey va 13 megapikselli asosiy kameraga ega. Shuningdek smartfonda selfi uchun mo‘ljallangan 5 megapikselli old kamera ham mavjud.

Batareya sig‘imi 2600 mA/soatga teng. Qurilma o‘lchamlari 151×76,2×6,3 mm. U Android 4.4 KitKat operatsion tizimida ishlaydi.