2014-yilning dekabrida Butunjahon intellektual mulk tashkilotining (BIMT) 2014-yil uchun World Intellectual Property Indicators - “Intellektual mulk sohasidagi faoliyatning jahon ko‘rsatkichlari” ma’ruzasi nashr qilindi, deya xabar bermoqda O‘zbekiston Respublikasi Intellektual mulk agentligi rasmiy sayti. Ma’ruza intellektual mulkning quyidagi sohalarini qamrab olgan keng miqyosdagi ko‘rsatkichlardan iborat: patentlar, foydali modellar, tovar belgilari, sanoat namunalari, o‘simlik navlarini muhofazalash. Unda milliy va hududiy intellektual mulk idoralari, BIMT va Jahon banki tomonidan taqdim qilingan ma’lumotlardan foydalanilgan.
Jahon bo‘yicha intellektual mulk obyektlarini ro‘yxatga olish uchun talabnomalarni topshirish faolligi patentlar bo‘yicha 9%, tovar belgilari bo‘yicha 6,4%, sanoat namunalari bo‘yicha 2,5% va o‘simliklar navlari bo‘yicha 6,3% oshdi.
2013-yilda novatorlar tomonidan butun jahonda 2,57 million patent talabnomalari topshirilgan, bu 2012-yilga nisbatan 9 foizga ko‘pdir. Ulardan 1,71 millioni mamlakatlar rezidentlari, 0,86 millioni norezidentlar tomonidan topshirilgan.
Dunyoda topshirilgan talabnomalarning yarmidan ortig‘i Xitoy (butun dunyo hajmidan 32,1%) va AQShda (22,3%) topshirilgan, shu vaqtning o‘zida Yevropa patent idorasiga (EPI) topshirilgan talabnomalarning ulushi butun dunyo bo‘yicha hajmi kamayib 5,8 foizni tashkil qildi.
BIMT ma’ruzasida aytilishicha, 2013-yilda O‘zbekiston Respublikasi Intellektual mulk agentligi tomonidan ixtirolarga 557 ta talabnoma qabul qilindi. Shulardan milliy talabnoma topshiruvchilardan — 299 ta, chet ellik talabnoma topshiruvchilardan — 258 ta talabnoma qabul qilindi.
BIMTga a’zo bo'lgan 188 davlat orasida topshirilgan talabnomalar soniga ko‘ra O‘zbekiston Respublikasi ixtirolar bo‘yicha 67-o‘rin, foydali modellar — 32, sanoat namunalari — 61, tovar belgilari — 64, seleksiya yutuqlari (o‘simlik navlari) bo‘yicha esa 40-o‘rinni egalladi.
Sanoat mulki obyektlaridan uchtasi: ixtirolar, tovar belgilari va sanoat namunalari bo‘yicha topshirilgan talabnomalarning soniga ko‘ra O‘zbekiston tegishlicha 54, 57 va 54- o‘rinlarni egalladi.
Izoh (0)