Toshkentda yo‘qolib qolgan qizaloq 30 ga yaqin odam yordamida izlab topilgani xabar berildi

Facebook’dagi “Priznavaysya, Uzbekistan” sahifasi orqali yosh ona o‘zining yo‘qolib qolgan qizchasini topishga 30 ga yaqin odam yordam bergani haqida ma’lum qildi, deb xabar bermoqda “Uz24.uz”.

Ayolning yozishicha, u kech tushganda qizi bilan uyga qaytayotganda xayolga berilib, bolasini yo‘qotib qo‘ygan. Yon-atrofdan qizchani izlash ishlari foyda bermagach, ayol yig‘lab yuborgan. Yaqin joydan o‘z mashinasida o‘tib ketayotgan yigit bu holatni ko‘rib, yordamga oshiqqan. U bola yo‘qolganini bilgach uni izlashda yordam berish tanishlariga qo‘ng‘iroq qilgan va natijada 30 ga yaqin kishi to‘planib, qizaloqning fotosuratini olgan holda uni izlashga tushgan.

Oradan biroz vaqt o‘tgach onaga bola topilgani haqida xabar berilgan. Vaziyat xayrli yakunlangach, ona va bola uyiga eltib qo‘yilgan.