O‘zbekistondagi saylovlarda qonunchilikning qo‘pol tarzda buzilishi kuzatilmadi
Davlat hokimiyati vakillik organlariga 21-dekabr kuni o‘tkazilgan saylov bo‘yicha saylovga doir qonunchilik talablari qo‘pol ravishda buzilganligi holatlari haqida xabar va ma’lumotlar kelib tushmadi. Bu haqda O‘zbekiston Respublikasi Markaziy saylov komissiyasi raisi M. Abdusalomov o‘zining xalqaro va xorijiy kuzatuvchilar, mahalliy va chet el ommaviy axborot vositalari vakillari uchun o‘tkaziladigan matbuot anjumanidagi ma’ruzasida ma’lum qildi.
Lekin Markaziy saylov komissiyasi ishonch telefonlariga qator murojaatlar, takliflar, ba’zi masalalarda e’tirozlar kelib tushdi. Ularning barchasini qonunda ko‘rsatilgan muddat va tartibda ko‘rib chiqish va hal etish yuzasidan tegishli chora-tadbirlar ko‘rildi.
O‘zbekiston Respublikasi Oliy Majlisi Qonunchilik palatasiga saylov O‘zbekiston Respublikasining Konstitutsiyasi va saylov to‘g‘risidagi qonunlarida mustahkamlab qo‘yilgan barcha demokratik qoida va prinsiplarga rioya qilgan holda o‘tkazildi.
Hozirgi vaqtda Markaziy saylov komissiyasi okrug saylov komissiyalari va O‘zbekiston Ekologik harakati tomonidan taqdim etilgan bayonnomalar hamda boshqa hujjatlarni ko‘rib chiqmoqda.
“O‘zbekiston Respublikasi Oliy Majlisiga saylov to‘g‘risida”gi Qonunga muvofiq, zarur hollarda alohida uchastka saylov komissiyalarining materiallari Markaziy saylov komissiyasi tomonidan yana bir bor sinchiklab ko‘rib chiqilishi mumkin. Faqat shundan so‘ng Markaziy saylov komissiyasi saylov yakunlari to‘g‘risida qaror qabul qiladi.
Qonunchilikka ko‘ra, saylov yakunlari to‘g‘risidagi axborot va Qonunchilik palatasiga saylangan deputatlarning ro‘yxati saylovdan so‘ng 10 kundan, ya’ni 2014-yilning 31-dekabridan kechiktirmay Markaziy saylov komissiyasi tomonidan matbuotda e’lon qilinadi.
