O‘zbekiston TIV rahbari Yevropa tashqi faoliyat xizmati departamenti direktori bilan uchrashdi

2014-yilning 17-dekabr kuni O‘zbekiston Respublikasi Tashqi ishlar vaziri Abdulaziz Komilov Yevropa tashqi faoliyat xizmati (YTFX) departamenti direktori Gunnar Vigandni qabul qildi, deb xabar berildi O‘zbekiston Respublikasi Tashqi ishlar vazirligi rasmiy saytida.

Gunnar Vigand “O‘zbekiston — Yevropa Ittifoqi” hamkorligi qo‘mitasining Toshkent shahridagi navbatdagi yig‘ilishida ishtirok etayotgan Yevropa Ittifoqi delegatsiyasiga boshchilik qilmoqda.

Suhbat davomida ikki tomonlama munosabatlarni rivojlantirish masalalari hamda “O‘zbekiston — Yevropa Ittifoqi” hamkorligi kengashining 2014-yil 17-mart kuni Bryussel shahridagi yig‘ilishi doirasida erishilgan kelishuvlarni amalga oshirish jarayoni muhokama qilindi.

Bo‘lib o‘tgan fikr almashinuvi turli sohalardagi hamkorlikni yanada chuqurlashtirishga ikki tomonda ham qiziqish mavjudligini tasdiqladi. Jumladan, iqtisodiy va ijtimoiy rivojlanish, atrof muhitni asrash, parlament tizimini mustahkamlash, sud-huquq va ta’lim sohalarini isloh qilish, fuqarolik jamiyatini rivojlantirishga qaratilgan istiqbolli loyihalar bo‘yicha hamkorlik aloqalar rivojida alohida o‘ringa ega.

Shuningdek, xalqaro muammolarning dolzarb jihatlari ko‘rib chiqildi.

Uchrashuvda Yevropa Ittifoqi delegatsiyasi boshlig‘i, elchi Yuriy Shterk ham ishtirok etdi.