O‘zbekiston futbolchilari Falastinni kichik hisobda mag‘lubiyatga uchratdi
O‘zbekiston milliy terma jamoasi Dubaydagi yig‘in davomida Falastinga qarshi o‘rtoqlik o‘yini o‘tkazdi. Uchrashuvda Mirjalol Qosimov shogirdlari kichik hisobdagi g‘alabaga erishdi, deb xabar beradi “Uff.uz”.
Yagona gol 85-daqiqada Sardor Rashidov tomonidan kiritildi. Ta’kidlab o‘tish joiz, Rashidov zaxiradan maydonga tushgan edi.
Uchrashuv O‘zbekiston milliy terma jamoasining ustunligi bilan boshlandi. Falastin to‘liq himoyada harakat qildi va faqat birinchi bo‘lim o‘rtalariga kelib hujumga o‘ta boshladi. Mirjalol Qosimov shogirdlari ko‘p bora gol urish uchun imkoniyatga ega bo‘lgan bo‘lsa-da, birinchi bo‘limda hisob ochish nasib qilmadi.
Ikkinchi bo‘limda tajribali Server Jeparov va tezkor Sardor Rashidov maydonga tushirildi. Garchi bu o‘zgarish terma jamoa o‘yinini jonlantirgan bo‘lsa-da, hisobni ochish ancha qiyin bo‘ldi. 85-daqiqaga kelib, Lutfulla To‘rayevning to‘p uzatishidan so‘ng Sardor Rashidov darvoza tomon xavfli zarba berdi. Bu zarbani darvozabon bartaraf etishga muvaffaq bo‘lgandi, ammo Sardorning o‘zi qaytgan to‘pni takroran darvoza tomon yo‘lladi va hisobni ochdi.
Shu tariqa uchrashuv 1:0 hisobida O‘zbekiston milliy terma jamoasining g‘alabasi bilan yakuniga yetdi.
O‘zbekiston — Falastin 1:0 (O‘rtoqlik o‘yini)
Gol: Sardor Rashidov 85
- Darvozabon: Eldor Suyunov
- Himoyachilar: Akmal Shorahmedov, Shavkat Mullajonov (Yegor Krimets), Farrux Sayfiyev (Merzlyakov), Anzur Ismoilov.
- Yarim himoyachilar: Javlon Ibrohimov, Temur Kapadze (Jamshid Iskanderov), Lutfulla To‘rayev, Jasur Hasanov (Server Jeparov)
- Hujumchilar: Vohid Shodiyev (Navro‘z Olimov), Igor Sergeyev (Sardor Rashidov).
