Gorbachyov Rossiya va G‘arbni o‘zaro munosabatlarni iliqlashtirish bo‘yicha sammit o‘tkazishga chaqirdi
Sobiq Ittifoqning birinchi va oxirgi prezidenti Mixail Gorbachyov Rossiya va G‘arb davlatlarini o‘rtadagi keskin munosabatlarni iliqlashtirish bo‘yicha sammitlar o‘tkazishga chaqirdi, deb xabar bermoqda “Gazeta.ru”.
“Men Rossiya va AQSh yetakchilariga keng kun tartibi bo‘yicha oldindan hech qanday shartlar qo‘ymasdan sammit o‘tkazishni taklif qilaman. Munosabatlarning barcha jabhalari va muammolarni ko‘rib chiqish kerak. Baribir ushbu ikki davlat zimmasida ulkan mas’uliyat bor. Ular bu mas’uliyatlardan chetga chiqa boshlasa, butun dunyo uchun og‘ir oqibatlar bo‘ladi”, − dedi Gorbachyov.
Uning so‘zlariga ko‘ra, global tahdidlar ustida ishlashni qayta boshlash, shuningdek 1990-yillar boshida ilgari surilgan Yevropa uchun Xavfsizlik kengashini ishlab chiqish kerak. U yuqorida aytilganga o‘xshagan sammit Rossiya va Yevropa ittifoqi o‘rtasida ham o‘tkazilishi lozimligini ta’kidlagan. Gorbachyovning aytishicha, kimdir tashviqot urushida mag‘lub bo‘lishidan qo‘rqmaslik kerak, chunki bu tarixda qolib ketgan bo‘lib, hozirda kelajak haqida o‘ylash lozim.
