Rossiyaning Sankt-Peterburg shahri huquq himoyachilari Coca-Cola HBC zavodi direktori Dmitriy Soshnev jasadini topdi, deya xabar bermoqda “Rossiyskaya gazeta”. Murda Frunze tumanidagi garajlardan birida aniqlangan.
“Qotillik” moddasi bo‘yicha ochilgan jinoiy ishni tergov qilish davomida ikki nafar gumonlanuvchi — 28 yoshli ozarbayjonlik Denis Chxitauri va muqaddam sudlangan 46 yoshli Vyacheslav Finogenov qo‘lga olindi.
Tergov versiyasiga ko‘ra, yovuz niyatli kishilar 28-noyabr, juma kuni Soshnevni aldab, garajli hududga chaqirib olgan. Finogenov unga qirqma ov miltig‘idan o‘q uzib o‘ldirgan.
Marhum o‘zi bilan keltirgan 150 ming rublni va BMW avtomobilidagi hujjatlarni jinoyatchilar olib qo‘ygan. Ular jasad va qurolni garajlardan biriga yashirgan.
Eslatib o‘tamiz, zavod direktori yo‘qolib qolganligi haqidagi arizani politsiyaga uning onasi 30-noyabr, yakshanba kuni bergan. Ayolning aytishicha, 28-noyabr kuni ertalab 8 da Soshnev yirik miqdordagi pul bilan ishga jo‘nab ketib, qaytib kelmagan.
Izoh (0)