Braziliyada 2016-yilgi Olimpiada va Paralimpiada timsollari namoyish etildi

Braziliya hayvonot dunyosini o‘zida mujassam qilgan obraz – ko‘rinishi mushukni eslatuvchi sariq rangli jonzot Rio-de-Janeyroda bo‘ladigan Olimpiya o‘yinlarining timsoliga aylandi. Bu haqda “TASS”ga asoslanib “Kun.uz” xabar bermoqda.

Paralimpiya o‘yinlari timsolini tayyorlashda esa musobaqa tashkilotchilari mahalliy o‘simlik dunyosidan ilhom olgan – musobaqalar ramzi etib ko‘rinishi daraxtni yodga soladigan ko‘k-yashil mavjudot tanlangan.

Endi braziliyaliklar internetda tashkil etiladigan so‘rovnoma yordamida 2016-yilda bo‘lib o‘tadigan o‘yinlarning ramzlariga nom tanlashlari kerak bo‘ladi.

Hozircha nom masalasida uchta variant bor, bular – Oba va Eba, Tiba-Tuki va Eskindim, shuningdek, Vinisius va Tom. Nomlar qatoridagi so‘nggi juftlik braziliyalik mashhur mashshoqlar – Vinisius di Morays va Tom Jobim sharafiga atalgan.

Braziliyaning Rio-de-Janeyro shahridagi yozgi Olimpiya o‘yinlari 2016-yilning 5−21-avgust kunlari o‘tkazilishi rejalashtirilgan.