O‘zbekiston TIVda Xitoy Kommunistik partiyasi Markaziy Qo‘mitasi bo‘lim boshlig‘i o‘rinbosari bilan uchrashuv bo‘lib o‘tdi

2014-yilning 18-noyabr kuni Tashqi ishlar vazirligida O‘zbekistonga tashrif buyurgan Xitoy Kommunistik partiyasi Markaziy Qo‘mitasi bo‘lim boshlig‘i o‘rinbosari Chjou Li boshchiligidagi delegatsiya bilan uchrashuv bo‘lib o‘tdi. Bu haqda O‘zbekiston Tashqi ishlar vazirligining matbuot xizmati xabar bermoqda.

Suhbat chog‘ida ikki tomon kun tartibining dolzarb masalalari, 2013-yilning 8—10-sentabr kunlari Toshkent va Samarqand shaharlarida hamda 2014-yilning 19—20-avgust kunlari Pekin shahrida bo‘lib o‘tgan oliy darajadagi O‘zbekiston — Xitoy muzokaralari doirasida erishilgan kelishuvlarning amalga oshish jarayoni muhokama qilindi.

Uchrashuvda qayd etilganidek, Hamkorlik bo‘yicha hukumatlararo qo‘mita va uning kichik qo‘mitalari majlislari, tashqi ishlar vazirliklari o‘rtasidagi muntazam maslahatlashuvlar, turli darajadagi muloqotlar kabi o‘zaro munosabatlarning institutsional mexanizmlari O‘zbekiston — Xitoy o‘rtasidagi aloqalarni izchil rivojlantirishda muhim rol o‘ynaydi.

Shuningdek, tomonlar ayrim xalqaro va mintaqaviy muammolar, jumladan, XXR yangi tashabbuslari borasida fikr almashdi.

Muzokaralarda Xitoy elchisi Sun Litsze ishtirok etdi.