Rossiyadagi “Vnukovo” aeroportida Falcon samolyotining halokatga uchrashi bilan bog‘liq jinoiy ish bo‘yicha yana bir kishiga ayblov e’lon qilindi, deya xabar bermoqda Gazeta.ru Tergov qo‘mitasi matbuot xizmatiga tayanib.
Aeroport dispetcheri Aleksandr Kruglovga Rossiya Federatsiyasi Jinoyat kodeksining 263-moddasi 3-bandi (harakat xavfsizligi va havo transportidan foydalanish qoidalarini buzib, ikki yoki undan ortiq shaxsning o‘limini keltirib chiqarish)da ko‘zda tutilgan jinoyatlarni sodir qilish bo‘yicha ayblov qo‘yildi.
Kruglov ayblanuvchi sifatida tergov qilindi. U ayni paytda hibsda saqlanmoqda.
Eslatib o‘tamiz, 29-oktabr kuni stajyor dispetcher Svetlana Krivsunga nisbatan xuddi shunday ayblov e’lon qilingan edi.
21-oktabrga o‘tar kechasi Moskva—Parij reysi bo‘yicha parvoz qilmoqchi bo‘lgan to‘rt o‘rinli Falcon samolyoti maxsus texnika mashinasiga urilib, yonib ketdi va uchish-qo‘nish yo‘lagiga qulab tushdi. Samolyot butunlay yonib ketdi, undagi odamlarni qutqarib qolish iloji bo‘lmadi. Halokat natijasida Fransiyaning Total neft kompaniyasi rahbari Kristof de Marjeri va uch nafar ekipaj a’zosi nobud bo‘ldi.
Izoh (0)