BMT Jahon sayyohlik tashkiloti Bosh kotibi Taleb Rifaining YuNVTO Ijroiya kengashi 99-sessiyasining ochilish marosimida nutq so‘zladi, deb yozadi O‘zA.

Bosh kotib o‘z nutqi avvalida O‘zbekistonda sayyohlik sohasida erishilgan yutuqlarga to‘xtalib o‘tdi.

Ushbu hududdagi tarixga nazar solar ekan, Taleb Rifai Yevropa tarixida muhim o‘rin tutgan Renessans, ya’ni, Uyg‘onish davri aslida mana shu zaminda ancha ilgari boshlanganini ta’kidladi va zamonaviy madaniyat hamda sivilizatsiya aynan shu mintaqada paydo bo‘lgan, deb ishonch bildirdi. “Shu zaminda tug‘ilib voyaga yetgan buyuk insonlar bashariyat sivilizatsiyasi rivojiga ulkan hissa qo‘shgan. Algebra asoschisi Xorazmiy, faylasuf Forobiy yoki ulug‘ qomusiy olim Abu Rayhon Beruniy, tibbiyot ilmiga asos solgan Abu Ali ibn Sino kabi buyuk alloma va mutafakkirlarni butun dunyo yaxshi biladi”, — dedi u.

“Turizmni rivojlantirish katta mas’uliyat talab etadi. O‘zining tarixiy va madaniy merosini asrab-avaylab kelayotgan O‘zbekistonda umumbashariy boylik hisoblangan noyob tarixiy yodgorliklarni restavratsiya qilish va qayta tiklashga katta miqdorda mablag‘ yo‘naltirilayotgani quvonarli holdir.

Ayni paytda Buyuk ipak yo‘li mashhur brendga aylandi va bepoyon Osiyo mintaqasi, jumladan, O‘zbekistonda turizmni yanada rivojlantirishga xizmat qilmoqda”. — dedi Bosh kotib.

U o‘z nutqiga yakun yasar ekan, forum samarali o‘tishiga qat’iy ishonch bildirdi.