1-oktabr kuni erta tongdan Toshkentdan Silk Route — 1200 kilometrli xalqaro velomarafon start oldi, deya xabar bermoqda “Gazeta.uz”. O‘n nafar sportchilar 06:30 da SMS ITI mehmonxonasidan Toshkent—Buxoro—Samarqand—Toshkent (Jizzax va Navoiyga tushilmaydi) yo‘nalishi bo‘yicha jo‘nab ketdi.
Parijning Audax Club Parisien randonnyorlar (velopoygachilar) klubi qoidalari bo‘yicha o‘tkazilayotgan brevet (uzoq masofali velopoyga)da Gollandiya, Germaniya, Shvetsiya, Rossiya va O‘zbekiston sportchilari qatnashmoqda.
Bunday velomarafonlar O‘zbekistonda 2011-yildan buyon o‘tkazib kelinadi. Dastlab unda faqat mahalliy sportchilar ishtirok etgan, keyinroq xalqaro velosipedchilar ham kelib qo‘shila boshlagan.
Marafon tashkilotchisi — O‘zbekiston Ekstremal va tog‘ turizmi federatsiyasi vakili Svetlana Kapranovaning “Gazeta.uz” nashriga ma’lum qilishicha, 1209 kilometrlik masofani 90 soatda bosib o‘tish rejalashtirilmoqda.
ACP qoidalariga muvofiq, har bir sportchi yo‘lni mustaqil ravishda, boshqalarning ko‘magisiz (favqulodda holatlardan tashqari) bosib o‘tishi kerak.
O‘zbekistonlik ikki ishtirokchi Samarqand—Toshkent yo‘nalishidagi qisqaroq yo‘lni bosib o‘tadi.
Finish 4-oktabr kuni 00:00 da bo‘lib o‘tishi ko‘zda tutilgan.
Marafonning borishini xt-uz.com saytida kuzatish mumkin.
Izoh (0)