Avval xabar berganimizdek, 2014-yilning 25—27-sentabr kunlari tashqi ishlar Vaziri Abdulaziz Komilov boshchiligidagi O‘zbekiston Respublikasi delegatsiyasi BMT Bosh Assambleyasi 69-sessiyasidagi umumiy munozaralarda ishtirok etdi.

Unda O‘zbekiston TIV rahbari BMT Bosh Assambleyasi kun tartibidagi ba’zi muhim masalalar bo‘yicha gapirib o‘tdi.

U jumladan 2030-yilgacha O‘zbekistonda yalpi ichki mahsulotning kishi boshiga 9,3 ming dollargacha oshishi ko‘zda tutilganini aytdi.

“O‘zbekiston Afg‘onistonning ichki ishlariga aralashmaslik siyosatini olib bormoqda, u bilan har ikkala mamlakat milliy manfaatlarini ko‘zlagan holda, ikki tomolama asosda barqaror va do‘stona munosabatlar o‘rnatadi va ularni rivojlantiradi. O‘zbekiston afg‘on xalqi saylaydigan hukumatni qo‘llab-quvvatlaydi”, — dedi Komilov.

U mintaqadagi ba’zi davlatlarning beg‘araz va professional bo‘lgan xalqaro ekspertizalarni o‘tkazmasdan turib, ulkan g‘ovli yirik GESlar qurish loyihalarini ilgari surishi nomaqbul ekanligini ta’kidladi.

“Oqibatlarni sinchkovlik bilan tahlil qilmasdan turib bunday loyihalarning amalga oshirilishi transchegaraviy daryolarning tabiiy oqib tushishini izdan chiqaradi hamda Markaziy Osiyodagi suv, oziq-ovqat va ekologik xavfsizlikni xatarga qo‘yadi, bu esa mintaqada tanglik va nizo potensiali o‘sishiga olib kelishi mumkin. 9 va undan yuqori magnitudali zilzilalar ehtimoli bo‘lgan, baland tog‘lardagi yuqori seysmik zonalarga bunday ulkan gidrotexnika inshootlarini qurish vayronkor texnogen ofat xavfini keltirib chiqaradi”, — dedi Abdulaziz Komilov.