Ispaniya Vazirlar kengashi Kataloniya mustaqilligi borasida o‘tkaziladigan referendum to‘g‘risidagi farmonning qonuniyligi masalasida Konstitutsiyaviy sudga murojaat qilish to‘g‘risida qaror qabul qildi. Bu haqda Vazirlar kengashining favqulodda yig‘ilishi yakunlariga ko‘ra mamlakat bosh vaziri Mariano Raxoy ma’lum qildi, deb xabar bermoqda “RIA Novosti”.
Kataloniya rahbari Artur Mas shanba kuni viloyatning Ispaniyadan mustaqilligi borasidagi referendum 9-noyabrda o‘tkazilishi to‘g‘risidagi farmonni imzolagan edi. Shuningdek, Kataloniyada Madridning roziligisiz umumxalq so‘rovlar o‘tkazsih mumkinligi to‘g‘risidagi qonun ham kuchga kirdi.
Ispaniya hukumatining yuqori maslahat organi hisoblangan Davlat kengashi yakshanba kuni shu yuzadan Konstitutsiyaviy sudga murojaat qilish fikrini ma’qulladi. Davlat kengashi a’zolarining fikricha, referendum to‘g‘risidagi farmon ham, so‘rovlar to‘g‘risidagi qonun ham mamlakat konstitutsiyasiga zid. Bu boradagi qaror bir ovozdan qabul qilingan.
Agar Konstitutsiyaviy sud ishni ko‘rib chiqishni boshlasa, referendum to‘g‘risidagi farmon konstitutsiyaga binoan 5 oyga muzlatib qo‘yiladi. Agar bu vaqt ichida yechim topilmasa, sud muddatning uzaytirilishi borasida qaror qabul qilishi kerak. Kataloniya hukumati raisi sud referendum o‘tkazishga imkon berishidan umid qilayotganini ma’lum qilgan.
Mintaqa hukumati rejalariga binoan, 9-noyabr kuni kataloniyaliklarga ikkita savolga javob berish taklif qilinadi: “Siz Kataloniyaning davlatga aylanishini istaysizmi?” va “Agar ha bo‘lsa, Kataloniya mustaqil davlat bo‘lishini xohlaysizmi?” Referendumda avtonomiyaning 16 yoshdan oshgan aholisi qatnashishi mumkin.
Izoh (0)