“MTS” o‘rniga ochiladigan operator abonentlariga yangi raqamlar beriladi
2014-yil 10-sentabrga qadar yangi Universal Mobile Systems mobil aloqa operatoriga O‘zbekiston Aloqa, axborotlashtirish va telekommunikatsiya texnologiyalari davlat qo‘mitasi tomonidan tegishli litsenziya beriladi.
Mutaxassislar fikricha, mobil aloqa xizmatlarini ko‘rsatish uchun yangi kompaniya tuzilayotgani tufayli bo‘lajak abonentlar bilan yangi shartnomalar tuziladi va ular asosida yangi raqamlar beriladi. Raqamlar diapazoni esa saqlanib qoladi.
O‘zbekiston Vazirlar Mahkamasi “Mobil aloqa xizmatlarini ko‘rsatish bo‘yicha Universal Mobile Systems qo‘shma korxonasini tuzish to‘g‘risida”gi qarorni qabul qilgan. Qarorda belgilanishicha, UMS’ni tuzish ishlari 15-avgustgacha, uni ro‘yxatga olish ishlari esa 25-sentabrga qadar tugallanishi kutilmoqda. Bundan tashqari, qo‘shma korxona 1-noyabrga qadar texnik, 1-dekabrga qadar tijoriy ekspluatatsiyani amalga oshiradi.
Avvalroq, “MTS” kompaniyasi O‘zbekiston hukumati bilan murosa bitimi imzolagani, O‘zbekistonda yangi qo‘shma korxona tashkil etishi, korxonaning 50,01 foizi “MTS”ga, 49,99 foizi esa O‘zbekiston hukumatiga tegishli bo‘lishi haqida xabar bergan edi.
