2014-yil 27-iyun kunidagi O‘zbekiston Respublikasi Vazirlar Mahkamasining qarori bilan Oliy ta’lim muassasalarining bakalavriatiga talabalarni qabul qilish tartibi to‘g‘risidagi Nizomga qator o‘zgartirishlar kiritildi.
Xushnudbek Xudayberdiyev o‘z blogida yozishicha, abituriyentlar e’tibor qaratishi lozim bo‘lgan yagona jiddiy o‘zgartirish, bu test sinovlari natijasidan norozi bo‘lgan abituriyentlar uchun apellyatsiya berish muddatining o‘zgartirilganidir. Bu bo‘yicha Nizomga quyidagi yangi band qo‘shildi:
“Test sinovlari natijasidan norozi bo‘lgan abituriyent test sinovlari natijasi e’lon qilingan kundan boshlab o‘n besh kun davomida Davlat komissiyasi tomonidan tasdiqlangan apellyatsiya komissiyasiga yozma tartibda apellyatsiya shikoyati berish huquqiga ega.”
Vazirlar Mahkamasi huzuridagi Davlat test markazi direktorining 2011-yilning 6-iyuldagi buyrug‘i bilan tasdiqlangan O‘zbekiston Respublikasi oliy ta’lim muassasalarining bakalavriatiga talabalarni qabul qilishda test sinovlarini o‘tkazish tartibi to‘g‘risidagi nizomga ko‘ra, apellyatsiya berish muddati 30 kun qilib belgilangan edi.
Vazirlar Mahkamasi qarorida esa ushbu muddat 15 kun qilib belgilandi. Ta’kidlash joizki, hozir ikkita hujjatda ikki xil muddat. Birida 15 kun, ikkinchisida 30 kun, deb yozadi huquqshunos. Ammo Vazirlar Mahkamasining qarori DTM direktori buyrug‘idan ustun turadi, shu sababli 15 kun haqiqiy muddat deb hisoblanadi.
Izoh (0)