UzReport TV telekanali va Beeline aloqa operatori Braziliyadagi FIFA—2014 Jahon Kubogi doirasida “Biz futbol ishqibozimiz” havaskor videotasmalar tanlovini o‘tkazadi. Bu haqda kompaniya matbuot xizmati xabar berdi.
Tanlovda ishtirok etish uchun jahon chempionati paytida futbolga ishqibozlik qilingan paytdagi qiziqarli holatni videoga olish kerak. Yorqin hissiyotlar, ishqibozlikning o‘ziga xos ko‘rinishlari, sevimli jamoani madh qiluvchi she’r va qo‘shiqlar, montaj hamda effektlar – bularning barchasi qo‘llab-quvvatlanadi.
Bir daqiqadan oshiq bo‘lmagan tayyor videotasmani istalgan video-serverlardan biriga joylashtirish, undan olingan havolani esa o‘z ismi, shaxsiy ma’lumotlari va “Tanlovga ariza” belgisi bilan fifa2014@uzreport.com manzili bo‘yicha yuborish zarur. Tanlov uchun arizalar – 2014-yilning 12-iyunidan 15-iyuligacha qabul qilinadi. Tanlovga faqat mualliflik ishlari qabul qilinadi.
Olingan videotasmalardan eng qiziqarlilari futbol bo‘yicha jahon chempionati mobaynida doimiy ravishda UzReport TV telekanalida namoyish etiladi.
Eng yaxshi ishlarning mualliflari tanlov tashkilotchilari tomonidan 2014-yilning 20-iyuliga qadar aniqlanadi va qimmatbaho sovg‘alar bilan taqdirlanadi:
- 1-o‘rin — Samsung Galaxy Note 10.1 plansheti
- 2-o‘rin — Samsung Galaxy S III mini smartfoni
- 3-o‘rin — 3G Wi-Fi ruter
Izoh (0)