To‘qqiz yil oshqozonida qaychi bilan yashagan bosniyalik jarrohlarni sudga berdi
Bosniya va Gersegovinada Alen Papach ismli kishi operatsiyadan so‘ng oshqozonida qaychini unutib qoldirgan shifokorlarni sudga berdi. Bu haqda Croatian Times xabar berdi. Papach oshqozonidagi og‘riq tufayli rentgen tekshiruvidan o‘tganidagina bundan xabar topdi.
Qaychi kishining tanasida to‘qqiz yil qolib ketgan. U bundan ikki yil avval olib tashlangan bo‘lsa-da, shifokorlar xatosidan jabrlangan erkak kasalxonadan tovon puli ololganicha yo‘q, endi u tibbiyot muassasasi bilan sudlashishga qaror qildi.
38 yoshli Papach 2003-yilda oshqozon yarasidan azob chekkani tufayli jarrohlikni boshidan o‘tkazgan. Biroq shundan keyin me’dasida chidab bo‘lmaydigan og‘riqlar paydo bo‘lgan. Oxiri yana doktorlarga murojaat qilgan. Rentgen tekshiruvi oshqozonida 12 santimetrli qaychi borligini ko‘rsatgach, yana jarrohlik stoliga yotgan.
Kasalxonadan chiqqach, unga qaychi “hadya qilgan” klinikaga qaytib borgan va tovon puli talab qilgan. Unga pul tugul, rasmiy uzrni ham nasiya qilishgan, shu sababli Papach sudga murojaat qilgan. Voqeadan xabar topgan mahalliy OAV klinika rahbariyati bilan bog‘langan, biroq ular izoh berishdan bosh tortib, sudda ish ko‘rilishi boshlanganini tasdiqlash bilan cheklanishgan.
