Tojikistonda YouTube’ni yana blok qilishdi

Tojikiston hukumati YouTube videoxostingiga kirishni yana chekladi. Bu haqda, Tojikiston internet-provayderlari uyushmasi raisi Asomiddin Atoyevga asoslanib, «RIA Novosti» axborot agentligi xabar bermoqda.

“Hozircha ushbu videoxostingga kirishni kamida to‘rtta internet-provayder chekladi”, – deydi Atoyev.

Uning so‘zlariga ko‘ra, bir qator internet-kompaniyalarning rahbarlari Tojikiston aloqa xizmati nazoratchilari ko‘rsatmasiga asosan, YouTube’ga kirishni cheklaganliklarini unga ma’lum qilishgan.

“Aloqa xizmatining o‘zi hozircha bizning rasmiy so‘rovimizga javob bergani yo‘q”, – deya qo‘shimcha qildi Atoyev.

Kun.uz yozishicha, 2013-yil iyulidan beri YouTube Tojikistonda to‘rtinchi marta blok qilinmoqda.

So‘nggi ikki yil davomida Tojikiston hukumati qator saytlarni, xususan, Facebook ijtimoiy tarmog‘i, Rossiyaning Ria.ru va Vesti.ru axborot portallariga kirishni cheklagan edi.

Odatda, Tojikiston rahbariyati bunday cheklovlarni “texnik nosozliklar” bilan izohlaydi.

Biroq 2013 yil mayida YouTube’ga Tojikiston prezidentining katta o‘g‘li Rustamning to‘yi va bunga taniqli muxolifat vakili va jurnalist Dodojon Atovullayevning munosabati bildirilgan ko‘rsatuv joylashtirilganidan so‘ng, videoservis blok qilingan edi.