UNWTO Ijroiya kengashining 99-majlisi Samarqandda o'tkazilishi rasman tasdiqlandi

6-iyun kuni Jahon sayyohlik tashkiloti (UNWTO)ning Ijroiya kengashi o‘zining 99-majlisini Samarqand shahrida o‘tkazish uchun ovoz berdi. Bu haqda UzReport xabar berdi.

Qaror 2014-yilning 4—6-iyun kunlari Ispaniyadagi Santyago-de-Kompostela shahrida o‘tkazilgan UNWTO 98- sessiyasida qabul qilindi. Navbatdagi majlis o‘tkaziladigan joy Ijroiya kengashi a’zolarining ochiq ovoz berishi orqali aniqlandi.

Avvalroq, UNWTO ijrochi direktori Zoltan Shomogi Berlindagi ITB—2014 Xalqaro sayyohlik yarmarkasida 99- sessiyani Samarqandda o‘tkazish bo‘yicha qaror haqida ma’lum qilgan edi. Biroq rasmiy e’lon Ijroiya kengashining barcha a’zolari roziligini talab qilgan edi.

Eslatib o‘tamiz, 20 yil avval Buyuk Ipak yo‘li bo‘ylab sayyohlikni rivojlantirish xalqaro loyihasiga a’zo-mamlakatlarning Samarqand deklaratsiyasi qabul qilingan edi. 2004-yildan boshlab esa Samarqandda UNWTO qo‘llab-quvvatlash ofisi faoliyat yuritib kelmoqda.