Poytaxtdagi “Istiqlol” saroyida “Biz – Mustaqillik farzandlarimiz” xayriya konserti bo‘lib o‘tdi. Bu haqda O‘zA xabar berdi.
Respublika Savdo-sanoat palatasi tomonidan O‘zbekiston Kasaba uyushmalari federatsiyasi kengashi, bir qator hamkor tashkilotlar bilan birgalikda tashkil etilgan tadbirga mehribonlik va muruvvat uylari tarbiyalanuvchilari, maxsus maktab-internatlar o‘quvchilari, Toshkent shahri mahallalaridagi kam ta’minlangan oilalar farzandlari taklif etildi.
– Muassasamizda 320 nafar bola tarbiyalanadi, – deydi 1-Muruvvat uyi tarbiyachisi Muyassar Xo‘jayeva. – Ularning salomatligini asrab-avaylash, ijtimoiy himoyalash, intellektual salohiyatini rivojlantirish uchun zarur barcha sharoit yaratilgan. Bu kabi ma’rifiy tadbirlar mamlakatimizda tibbiy, ijtimoiy imkoniyatidan qat’iy nazar, barcha bolalar birdek mehr va e’tibor og‘ushida ekanining amaldagi yana bir yorqin namunasidir.
Tadbirda “Marvarid” bolalar ijodiy teatr jamoasi hamda estrada ijrochilari ishtirokidagi konsert dasturi namoyish etildi. Bolalarga sovg‘alar topshirildi.
Izoh (0)