AQSh prezidenti Barak Obama NATOga a’zo Sharqiy Yevropa mamlakatlariga harbiy yordamni ko‘paytirishga va’da berdi. Uning hajmi 1 milliard dollargacha yetishi mumkin. Bu haqda Euronews xabar berdi.
Ayni paytda Polshada bo‘lgan AQSh yetakchisi qo‘shimcha harbiy qismlar kiritish ehtiyoji haqida ham gapirdi. U yerdagi uchrashuvda Ukrainadagi tanglik, uni hal etish yo‘llari, Yevropadagi ittifoqdoshlarni xavfsizlik bilan ta’minlash masalalari muhokama qilindi.
Obama Putin bilan ish yuzasidan doimo aloqada bo‘lib turganini, tanglik davomida u bilan telefon orqali suhbatlashib, jamoatchilikka e’lon qilgan fikrlarini u bilan ham ochiqdan-ochiq bo‘lishganini aytdi. “Biz Rossiya bilan yaxshi aloqalar o‘rnatishdan manfaatdormiz, unga tahdid qilishdan bizga ham foyda yo‘q”, — dedi u.
Prezident, shuningdek AQSh “Ukrainani demokratiyaga erishish yo‘lida qo‘llab-quvvatlab turishda davom etishi”ni bildirdi.
Izoh (0)