Rossiyaning “Sputnik” qidiruv tizimi auditoriyasi bir hafta ichida 8,5 marta kamaydi

Beta-versiyasi ishga tushirilganidan ikki hafta o‘tib, “Sputnik” qidiruv-servis platformasiga tashrif buyuruvchilar soni taxminan olti marta tushib ketdi. Bu haqda LookAtMe xabar berdi.

22-may (ishga tushirilgan) kuni foydalanuvchilar “Sputnik” qidiruvi natijalari orqali boshqa saytlarga 141,8 ming marta o‘tishgan. 27-mayga kelib, ushbu ko‘rsatkich 23,6 mingtagacha, 28-may kuni kechqurun 16,5 mingtagacha kamaygan. Natijada Rossiya hududidan beriladigan qidiruv so‘rovlari ichida “Sputnik” hissasi 0,01 foizga tushib qoldi. Taqqoslash uchun, bir sutkada qidiruv so‘rovlarining 62,2 foizi “Yandeks”, 27,7 foizi Google va 7,3 foizi Mail.ru hissasiga to‘g‘ri keladi.

“Sputnik” qidiruv servisini 22-may kuni “Rostelekom” ishga tushirgan edi. Tizim dorixonalar, yoqilg‘i shoxobchalari, davlat xizmatlari, tashkilotlar bo‘yicha qidiruv, shuningdek, teledastur, ob-havo ma’lumoti, yangiliklar xizmatlarini ham taqdim etgan. Keyinroq kompaniya to‘rt yil ichida ushbu qidiruv tizimi mahalliy saytlar orasida tashriflar bo‘yicha yuqori o‘ntalikka kirishi kerakligini ta’kidlagan.