28-may kuni “Fizika—Quyosh” ilmiy-ishlab chiqarish birlashmasining materialshunoslik institutida O‘zbekiston akademik litsey va kasb-hunar kollejlari o‘quvchilarining Namangan shahrida o‘tkaziladigan “Barkamol avlod—2014” sport musobaqalari mash’alasini quyosh nurlaridan o‘t oldirish marosimi bo‘lib o‘tdi. Unda O‘zbekiston mudofaasiga ko‘maklashuvchi “Vatanparvar” tashkilotining Respublika texnik va amaliy sport turlari markazi, tegishli vazirlik va idoralarning mas’ul xodimlari, keng jamoatchilik vakillari, o‘quvchi-yoshlar, sportchi va san’atkorlar ishtirok etdi. Bu haqda O‘zA xabar berdi.
Quyosh nurlaridan alanga olgan “Barkamol avlod—2014” mash’alasini futbol bo‘yicha o‘smirlar va yoshlar o‘rtasida o‘tkazilgan jahon chempionatlari ishtirokchisi, “O‘zbekiston iftixori” faxriy unvoni sohibi Abbosbek Maxsitaliyev, stol tennisi bo‘yicha jahon chempionati sovrindori, xalqaro turnirlar g‘olibi Nodira Burxonxo‘jayeva maydonga olib kiradi. Mash’alani ulardan olgan boks bo‘yicha Osiyo chempioni, Parkent transport va servis kasb-hunar kolleji o‘quvchisi Shahzod Ashirboyev Namangan viloyati sari yo‘lga tushdi.
“Barkamol avlod—2014” mash’alasi olib o‘tilayotgan shahar va qishloqlarda tantanali marosimlar bo‘lib o‘tmoqda.
– Yuksak saviyada tashkil etilayotgan “Kichik olimpiada”ga katta tayyorgarlik ko‘rdik, – deydi Olmaliq tibbiyot kolleji o‘quvchisi, tennischi Munisa Toshpo‘latova. – Asosiy maqsadimiz ushbu yirik sport anjumanida muvaffaqiyatli ishtirok etishdir. Shuningdek, musobaqalar davomida tajriba oshirish, do‘stlar orttirish, Namanganning diqqatga sazovor joylarini tomosha qilish imkoniga ega bo‘layotganimizdan xursandmiz.
Izoh (0)