Toshkentda badiiy gimnastika bo‘yicha jahon kubogi bosqichi va Happy Caravan xalqaro turniri boshlandi. Bu haqda O‘zA xabar berdi.
Badiiy gimnastika bo‘yicha bolalar-o‘smirlar respublika ixtisoslashgan olimpiya zaxiralari sport maktabida musobaqalarning tantanali ochilish marosimi bo‘ldi. Marosimda katta konsert namoyish etildi.
Jahon kubogi bosqichi va Happy Caravan xalqaro turnirida O‘zbekiston, Xitoy, Janubiy Koreya, Yaponiya, AQSh, Chexiya, Latviya, Janubiy Afrika Respublikasi, Malayziya, Meksika, Rossiya, Ozarbayjon, Armaniston, Belarus, Vyetnam, Isroil, Hindiston, Italiya, Qozog‘iston, Qirg‘iziston terma jamoalari ishtirok etadi.
– O‘zbekistonda ko‘plab sohalar singari sportni, jumladan, bolalar va xotin-qizlar sportini rivojlantirishga qaratilayotgan doimiy e’tibor yuksak samaralar berayotir, – deydi Xalqaro gimnastika federatsiyasi vakili Noha Abu Shabana. – Buni Toshkent shahrida badiiy gimnastika bo‘yicha nufuzli xalqaro musobaqalar muntazam ravishda o‘tkazilayotgani, O‘zbekistonda barcha sport anjumanlarini yuksak saviyada tashkil etish bo‘yicha katta tajriba to‘planganida ham ko‘rish mumkin.
Toshkent shahrida boshlangan badiiy gimnastika bo‘yicha jahon kubogi bosqichida dunyoning eng kuchli 80 nafarga yaqin gimnastikachisi, Happy Caravan xalqaro turnirida 40 nafardan ziyod o‘smir qizlar shaxsiy va guruh bahslarida arg‘amchi, xalqa, to‘p, bulava, tasmada mashq bajarish hamda ko‘pkurash bo‘yicha o‘z iste’dod va mahoratini namoyish etmoqda.
– Toshkentda o‘tayotgan nufuzli musobaqalarda qatnashayotganimizdan xursandmiz, – deydi Hindiston terma jamoasi murabbiyi Babra Jasbir Kaur. – O‘zbekiston badiiy gimnastika maktabi o‘zining boy an’analari va nomdor vakillariga ega.
Musobaqalarda O‘zbekiston sharafini Jamila Rahmatova, Yelizaveta Nazarenkova, Anora Davlatova, Nilufar Shomurodova va Jasmin Yusupova singari gimnastikachilar himoya qilmoqda.
Izoh (0)