Milliy matbuot markazida O‘zbekiston Respublikasi Xalq ta’limi vazirligi tomonidan 2013/2014-o‘quv yili yakunlari va istiqboldagi ustuvor vazifalarga bag‘ishlangan matbuot anjumani o‘tkazildi. Bu haqda O‘zA xabar beradi.
Ma’lumotlarga ko‘ra, bugungi kunda xalq ta’limi tizimida 15 729 ta’lim muassasasi faoliyat ko‘rsatmoqda. Umumiy o‘rta ta’lim maktablarida 4 million 458 ming nafardan ortiq o‘quvchiga 390 ming nafardan ziyod ustoz va murabbiy, maktabgacha ta’lim maskanlarida 581 ming nafardan ziyod kichkintoyga qariyb 52 ming nafar pedagog ta’lim-tarbiya bermoqda.
Joriy o‘quv yilida 394 ta’lim maskani o‘quv jihozlari, 1920 maktab qo‘shimcha jihozlar, 1485 maktab kompyuter texnikasi bilan ta’minlandi.
2014-yilda 3024 umumta’lim maktabi va 48 bolalar musiqa va san’at maktabini 106,2 milliard so‘mlik mebel, o‘quv-laboratoriya asbob-uskunalari, kompyuter texnikasi, sport anjomlari va musiqa asboblari bilan ta’minlash ko‘zda tutilgan. Umumta’lim maktablarining boshlang‘ich sinflari chet tili kabinetlarini 4193 to‘plam texnik vositalar hamda yuqori sinf chet tili xonalarini 1500 to‘plam kompyuter texnikasi bilan ta’minlash rejalashtirilgan. Ayni paytda bilim maskanlaridagi chet tillari xonalari uchun texnik vositalar, o‘quv adabiyotlari, lug‘atlar, rasmlar to‘plami, kompyuter texnikasini yetkazib berishga alohida e’tibor qaratilmoqda.
2013/2014-o‘quv yilida 392 nomdagi 22,5 million nusxa darslik va o‘quv-metodik qo‘llanmalar chop etilib, joylarga yetkazildi. Umumiy o‘rta, o‘rta maxsus, kasb-hunar ta’limi muassasalarida o‘qitiladigan 18 umumta’lim fani bo‘yicha 38 umumiy o‘rta, 28 o‘rta maxsus, kasb-hunar ta’limi maskanlarida kompetensiyaviy yondashuvga asoslangan davlat ta’lim standartlari va o‘quv dasturlari loyihalarining tajriba-sinov jarayoni amalga oshirilmoqda.
Izoh (0)