Poytaxtda shaxmat bo‘yicha birinchi o‘zbek grossmeysteri Georgiy Agzamov xotirasiga bag‘ishlangan Tashkent Open VIII xalqaro turnirining to‘rtinchi tur o‘yinlari yakunlandi. Bu haqda O‘zA xabar berdi.

Musobaqada mag‘lubiyatsiz o‘ynayotgan hamyurtlarimiz Anton Filippov va Aleksey Barsov to‘rtinchi turdan so‘ng 3,5 ochkodan jamg‘arib kuchlilar safida bormoqda. Anton to‘rtinchi partiyada belaruslik Sergey Jigalko bilan durang o‘ynagan bo‘lsa, Aleksey Barsov qozog‘istonlik Kazbek Primovni mag‘lubiyatga uchratdi.

Hozircha rossiyalik Pavel Smirnov va gruziyalik Mixail Mchedlishvili to‘rttadan ochko jamg‘argan holda turnirda peshqadamlik qilmoqda. Belaruslik Sergey Jigalko, ukrainalik Yuriy Kuzubov, hindistonlik Abhijit Gupta va armanistonlik Arman Pashikyan 3,5 tadan ochkoga ega.

– Turnir yuqori saviyada tashkil etilgani, shuningdek, O‘zbekiston sportchilari ajoyib natijaga erishayotgani menda katta taassurot qoldirmoqda, – deydi rossiyalik shaxmatchi Sergey Volkov. – Birinchi turda belaruslik xalqaro grossmeyster Andrey Jigalko ustidan g‘alaba qozongan o‘n yoshli shaxmatchi Nodirbek Abdusattorov barchani lol qoldirdi. O‘zbekistonda sportni rivojlantirish borasida yaratilgan shart-sharoitlar bunday yosh iste’dod sohiblarining muvaffaqiyatlariga zamin yaratmoqda.

Shaxmatchilarimizdan Nodirbek Abdusattorov, Nikita Xoroshev, Jo‘rabek Hamroqulov, Akmal Fayzullayev, Ulug‘bek Tillayev, Mohinur Qahramonova, Vladimir Yegin, Nafisa Mo‘minova, Bahodir Xolmirzayev va Vyacheslav A’zamov hisobida uchtadan ochko bor.

– O‘zbekistonlik shaxmatchilarning salohiyati e’tiborga loyiq, – deydi armanistonlik Robert Xovxannisyan. – Faoliyatini endi boshlayotgan shaxmatchilarning muvaffaqiyatlari o‘zbek sportining jahon sport arenasida yuqori mavqega egaligidan dalolat bermoqda. Toshkent go‘zalligi va betakror arxitekturasi bilan meni hayratga soldi. Yashil daraxtlarga burkangan bunday shaharni kam uchratganman.