2014-yil 14-may kuni Prezident Islom Karimov tomonidan imzolangan “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish, shuningdek, ayrim qonun hujjatlarini o‘z kuchini yo‘qotgan deb topish to‘g‘risida”gi Qonun asosida O‘zbekiston Respublikasining Xo‘jalik protsessual kodeksiga ayrim o‘zgartish va qo‘shimchalar kiritildi, deb yozadi huquqshunos Xushnudbek Xudayberdiyev o‘z saytida.
Jumladan, Kodeksga “Xo‘jalik sudining videokonferensaloqa rejimidagi majlisida ishtirok etish” deb nomlangan yangi 126-1-modda qo‘shildi.
Bu shundan dalolat beradiki, bundan buyon Xo‘jalik sudlarida nizolar ko‘rilayotgan vaqtda vaziyat taqozo etsa, videokonferensaloqa o‘rnatilishi mumkin. Videokonferensaloqa boshqa xo‘jalik sudi bilan o‘rnatiladi.
Videokonferensaloqa rejimidagi sud majlisini o‘tkazishga ko‘maklashadigan xo‘jalik sudi ishda ishtirok etuvchi shaxslar va xo‘jalik sudlov ishlarini yuritishning boshqa ishtirokchilari vakillari vakolatlarini tasdiqlovchi ishonchnomalar, shuningdek, sud majlisida taqdim etilgan yozma dalillar ishni ko‘rayotgan xo‘jalik sudiga yuborilishini ta’minlaydi.
Kodeksning 134-moddasiga kiritilgan o‘zgartishga ko‘ra, sud majlisi videokonferensaloqa rejimida o‘tkazilgan taqdirda, bayonnomada bu haqdagi ma’lumot ko‘rsatilishi kerak.
Agarda sud majlisi yopiq tarzda ko‘rilayotgan bo‘lsa, ishni videokonferensaloqa rejimida ko‘rishga yo‘l qo‘yilmaydi.
Eslatib o‘tamiz, mazkur o‘zgarishlar 2014-yilning 1-sentabrdan kuchga kiradi.
Xo‘jalik sudlariga da’vo arizalarni qabul qilish Oliy Xo‘jadik Sudining rasmiy sayti orqali amalga oshiriladi.
Izoh (0)