Toshkentda Jahon iqtisodiyoti va diplomatiya universiteti qoshidagi NATO depozitar kutubxonasining ochilishi bo‘lib o‘tdi. Alyansning ushbu tashabbusi NATO Jamoatchilik diplomatiyasi boshqarmasi va JIDU o‘rtasida 2013-yil dekabrida tuzilgan bitimga muvofiq amalga oshirildi. Bu haqda “Jahon” xabar berdi.
Marosimda NATO bosh kotibining Markaziy Osiyo va Kavkaz bo‘yicha maxsus vakili Jeyms Appaturay so‘zga chiqib, xalqaro munosabatlar kabi bunday muhim sohada talabalar va mutaxassislar bilan hamkorlik yo‘li orqali kelajakdagi o‘zaro munosabatlarga poydevor qo‘yilganini qayd etdi.
Nashrning yozishicha, kutubxona yaratishdan asosiy maqsad NATO va shu sohadagi mavzularga bog‘liq ma’lumotlarni talabalar, OAV, O‘zbekiston hukumati vakillari, diplomatik korpus va xalqaro tashkilotlar vakillariga taqdim etishdan iborat.
Kutubxonada shuningdek, turli tadbirlar ham o‘tkaziladi. Uning yillik byudjeti 15 ming yevro bo‘lib, alyans tomonidan ta’minlanadi.
16-may kuni Toshkentda Markaziy Osiyo mamlakatlari bilan aloqa va o‘zaro hamkorlik bo‘yicha NATO xodimi byurosi rasman ochildi.
Markaziy Osiyo mamlakatlari bilan aloqa va o‘zaro hamkorlik bo‘yicha NATO xodimi kichik shtat bilan birga NATOning joylardagi diplomatik vakili vazifasini bajaradi. Bundan tashqari, mudofaa rejasi va tahlili, NATO operatsiyalariga yordam berish, harbiy ta’lim va tayyorgarlik, ilmiy va ekologik masalalar bo‘yicha hamkorlik, jamoatchilik diplomatiyasi kabi sohalarda NATOning Markaziy Osiyodagi sheriklar bilan amaliy hamkorligiga ko‘mak beradi.
Izoh (0)