Xitoyning Xarbin shahrida taksichilik qiluvchi Chjao Ley o‘z mashinasining orqa o‘rindig‘idan topilgan qog‘oz paketga o‘ralgan 170 ming yuan (27 ming dollar) pulni qaytarib berdi, deb xabar bermoqda The Daily Mail. Xitoylik haydovchi pulni taksi kompaniyasiga topshirgan, kompaniya esa pulni yo‘qolgan mijozlarni topishga muvaffaq bo‘lgan.
Mashinadan topilgan pulning egasi taksichining avvalgi mijozlari – yosh yigit va qiz bo‘lib chiqqan. Ma’lum bo‘lishicha, ular yangi sotib olingan mashina pulini to‘lash uchun avtosalonga ketayotgan bo‘lgan, deb yozadi “Kun”.
Chjao Ley ishlaydigan kompaniya yo‘qolgan pulni egalariga qaytarib berganidan so‘ng mijozlar insofli haydovchiga mukofot sifatida 10 ming yuan (1,6 ming dollar) bermoqchi bo‘lgan, biroq haydovchi taklif qilingan rag‘bat pulidan voz kechib, bor-yo‘g‘i o‘z vazifasini bajarganini aytgan.
Taksichi tomonidan topilgan pul Xitoy uchun juda katta hisoblanadi. Xususan, bu pul haydovchini bir necha yilga ta’minlashi mumkin edi: mamlakatdagi haydovchilar haftasiga olti kundan ishlab, oyiga besh ming yuandan ko‘p pul topmaydi.
Shunga qaramay, Chjao Leyning xatti-harakatlarini o‘ziga xos deb bo‘lmaydi. Masalan, 2013-yili Las-Vegasdagi taksi haydovchisi mashinada unutib qoldirilgan 300 ming dollarni egalariga qaytarib bergan, 2012-yili esa Singapurda shu yo‘l bilan parishonxotir yo‘lovchilar o‘zlarining 900 ming dollarini qaytarib olgan edi.
Izoh (0)