Antarktida muzliklarining muqarrar erishi natijasida okean sathi uch metrga ko‘tariladi

Amerikalik olimlar Antarktida g‘arbida shelfli muzliklar eriy boshlaganini aniqladi. Natijada bir necha asrdan so‘ng dunyo okeani sathi taxminan uch metrga ko‘tariladi. Bu haqda Interfax xabar berdi.

The Verge nashri ma’lum qilishicha, so‘nggi haftada bu mavzuda ikkita tadqiqot natijalari e’lon qilingan. Har ikkalasida ham olimlar muzliklarning erish jarayonini to‘xtatib bo‘lmaydi, degan xulosaga kelishgan.

Vashington universiteti olimlari ham, NASA mutaxassislari ham Amundsen dengizidagi yirik Tueyts shelfli muzligi to‘liq erib ketgach, bu boshqa muzliklarga ham “yuqishi”, zanjirli reaksiya boshlanib ketishini aytishgan.

Tadqiqotlar mualliflarining ta’kidlashicha, muzliklar erishining tezlashishi birinchi navbatda, tabiiy omillarga bog‘liq. Odam faoliyatining oqibati bo‘lmish global isish ham bunda rol o‘ynagan bo‘lsa-da, ushbu jarayonning asosiy sababi okeanlar tubidan shamol yordamida yuzaga qalqib chiqayotgan iliq suvdir.