Dunyoning eng yirik texnologik va internet kompaniyalari, jumladan Google, Microsoft va Facebook AQShning Kommunikatsiyalar bo‘yicha federal komissiyasiga (FCC) talabnoma yozdi. Unda avval qabul qilingan tarmoq betarafligi tamoyillariga rioya qilishni so‘rashdi. Ushbu tamoyillardan voz kechishni kompaniyalar “internet uchun halokatli xavf” deb atadi. Bu haqda Bloomberg nashri xabar berdi.
Internet-gigantlarni o‘z trafiklarini aloqa tarmoqlari orqali kafolatlangan holda uzatish uchun to‘lov joriy qilinishi tashvishga soldi, deb yozadi nashr.
Tarmoq betarafligi tamoyili provayderlarga ba’zi internet-trafiklarni tanlab, qolganlariga ziyon yetkazishni man qiladi. Avvalroq AQSh prezidenti Barak Obama bu tamoyilni to‘liq qo‘llab-quvvatlashi xabar berilgan edi.
Biroq Amerika internet-provayderlarining faol qarshiliklari tufayli, FCC 15-may kuni yangi qoidalarni ko‘rib chiqadi. Ular internet-provayderlarga internet-servislardan trafiklarning aloqa tarmog‘i orqali kafolatli va sifatli tarzda uzatilishi uchun to‘lov qabul qilishni nazarda tutadi.
FCC raisi Tom Uilerning aytishicha, provayderlarning servislar bilan trafikni uzatishning pulli kafolati haqida shartnoma tuzishi tarmoq betarafligi tamoyillarini buzmaydi.
Biroq, internet-kompaniyalar fikricha, yangi qoidalar provayderlarga ba’zi onlayn-servislarni texnologik va moliyaviy nuqtai nazardan ajratishga imkon yaratadi, bu “internet uchun o‘lim xavfi bilan teng”. Ularning talabnomasiga FCC hozircha javob bergani yo‘q.
Izoh (0)