2014-yilgi yozgi ta’til mavsumida “Sog‘lom bola yili” Davlat dasturiga muvofiq Navoiy viloyati Nurota, Zarafshon, Tomdi, Uchquduq va Konimex tumanlaridagi ijtimoiy himoyaga muhtoj oilalar farzandlarining 600 nafarini Navoiy kon-metallurgiya kombinati tomonidan Zarafshon shahrida joylashgan “Zolotinka” bolalar sog‘lomlashtirish oromgohida bepul dam oldirish rejalashtirilmoqda. “Mahalla” xayriya jamoat fondi viloyat bo‘limi tashabbusi bilan 100 nafar bolaning bepul sog‘lomlashtirilishi belgilangan, deb xabar beradi O‘zA.
Navoiy viloyatida bolalar oromgohlari, sihatgohlari, sog‘lomlashtirish maskanlari faoliyatini yanada yaxshilash, ularning moddiy-texnik bazasini mustahkamlash, dam olish maskanlariga, avvalo, chekka hududlardagi kam ta’minlangan, ko‘p bolali oilalar farzandlarini, Mehribonlik uylari tarbiyalanuvchilarini jalb etish yuzasidan keng ko‘lamli chora-tadbirlar amalga oshirilmoqda. Mavsum davomida 12 ta shahardan tashqari va 25 ta umumta’lim maktablari qoshida tashkil etiladigan oromgoh o‘quvchilar ixtiyorida bo‘ladi. 16 ming nafardan ziyod bola yozgi ta’tilni mazkur maskanlarda maroqli o‘tkazishi uchun barcha sharoit yaratiladi.
— 2014-yilgi ta’tilni yuqori saviyada o‘tkazish maqsadida hamkor tashkilotlar bilan chora-tadbirlar rejasi ishlab chiqildi, — deydi viloyat kasaba uyushmalari tashkilotlari birlashmasi madaniy-ma’rifiy va sport ishlari bo‘limi mudiri Norimxol Nurmonova. — Jumladan, “Sog‘lom bola — yurt kelajagi” shiori ostida turli sport musobaqalari, “Sog‘lom bola — sog‘lom oila mevasi” mavzusida ma’naviy-ma’rifiy tadbirlar tashkil etish belgilangan. Taniqli san’atkorlar, adib va musavvirlar ishtirokida suhbat, uchrashuv va festivallar o‘tkaziladi.
Bolalar dam olish maskanlarida energetika, kommunal xizmat, avtotransport, sog‘liqni saqlash kabi sohalar mutaxassislarining tunu kun navbatchiligi tashkil etiladi. Bu jamoat xavfsizligini ta’minlash, yuzaga kelishi mumkin bo‘lgan kamchiliklarni o‘z vaqtida samarali bartaraf etish imkonini beradi.
Ayni kunlarda bolalar sog‘lomlashtirish oromgohlarida ularning moddiy-texnik bazasini mustahkamlash, zarur mebel jihozlari, sport inventarlari, texnologik uskunalar kabi zarur vositalar bilan ta’minlash ishlari olib borilmoqda.
Izoh (0)