Badiiy gimnastika bilan muntazam shug‘ullanib kelayotgan Sirdaryo viloyati Boyovut tumanidagi 2-umumta’lim maktabining 5-sinf o‘quvchisi Shahlo Nazarovaning bugun quvonchi cheksiz. Unga minglab tengdoshlari qatori milliy an’analari asosida tayyorlangan sport kiyimlari sovg‘a qilindi, deb xabar bermoqda O‘zA.
O‘zbekison Bolalar sportini rivojlantirish jamg‘armasi homiyligida sport bilan muntazam shug‘ullanayotgan 3 ming nafar qizga milliy an’analar asosida tayyorlangan sport liboslari sovg‘a qilindi.
Sirdaryo viloyati hokimligi, xotin-qizlar qo‘mitasi, Bolalar sportini rivojlantirish jamg‘armasi viloyat filiali hamkorligida tuman va shaharlarda o‘tkazilgan sport kiyimlarini topshirish marosimlari bayramona kuy-qo‘shiqlarga, sport musobaqalariga ulanib ketdi. Tadbirlarda sportchi qizlar badiiy gimnastika, dzyudo, tennis, kurash, yengil atletika bo‘yicha o‘z mahoratlarini namoyish etdi.
– Davlatimiz rahbari tashabbusi bilan bolalar sportini rivojlantirishga qaratilayotgan alohida e’tibor, xususan, qizlarga milliy an’analarimizga xos sport kiyimlari sovg‘a qilinayotgani ota-onalarning qizlar sportiga munosabatini tubdan o‘zgartirmoqda, – deydi Bolalar sportini rivojlantirish jamg‘armasi Sirdaryo viloyati filiali direktori Ulug‘bek Yo‘ldoshev. – Yil oxiriga qadar yana 3 ming nafarga yaqin sportchi qizlarga shunday kiyimlar sovg‘a qilinishi rejalashtirilgan.
Sirdaryo viloyatida 2003—2013-yillarda 79 bolalar sporti inshooti va musiqa maktablari foydalanishga topshirildi. Ayni paytda ushbu sport majmualarida 29 mingga yaqin bola sportning 43 turi bilan muntazam shug‘ullanmoqda.
2013-yilda 9 ming nafarga yaqin qiz sport bilan muntazam shug‘ullangan bo‘lsa, bugungi kunda sportning 36 turi bo‘yicha 779 seksiyada 10 ming 200 dan ziyod qiz malakali murabbiyalar rahbarligida mashg‘ulotlarda qatnashmoqda.
Izoh (0)