Niderlandiyaning Leyden shahrida joylashgan Xalqaro Osiyo tadqiqotlari institutida Amir Temurning tarixiy merosiga bag‘ishlangan ilmiy-amaliy seminar bo‘lib o‘tdi, deb xabar berdi “Jahon” axborot agentligi.
Tadbirda Niderlandiya ekspert-tahlil va akademik doiralari vakillari hamda tarixiy meros muhofazasi mutaxassislari ishtirok etdi.
Leyden universiteti va Xalqaro Osiyo tadqiqotlari institutining tadqiqotchisi Yelena Paskaleva ushbu ilmiy-amaliy seminarning asosiy ma’ruzachisi bo‘ldi. U o‘z chiqishida Amir Temurning iste’dodli sarkarda va buyuk siyosiy yetakchi bo‘lganini qayd etdi. Temur iqtisodiy, ijtimoiy, siyosiy va ma’naviy tamoyillar asnosida qudratli markazlashgan davlat yaratgan. Ulkan hududlarni qamrab olgan mazkur saltanat xalqaro savdo-sotiq va Yevropa bilan hamkorlikning jadal rivojlanishiga ham xizmat qilgan.
Ma’ruzachi mustaqillik yillari davomida O‘zbekiston hukumati tomonidan Samarqanddagi YUNESKO Butunjahon merosi ro‘yxatiga kiritilgan yodgorliklarni rekonstruksiya qilish uchun juda katta miqdorda byudjet mablag‘lari ajratilib, bu borada ulkan ishlar amalga oshirilganini e’tirof etdi. Ko‘plab tarixiy obidalar, hatto, ekspertlar tomonidan “tiklab bo‘lmaydi”, deya ta’riflangan yodgorliklar ham sifatli ta’mirlandi.
Tadqiqotchi seminar qatnashchilariga 2014-yil 15—16-may kunlari Samarqandda o‘tkaziladigan “O‘rta asr Sharq allomalari va mutafakkirlari tarixiy merosining hozirgi zamon sivilizatsiyasidagi roli va ahamiyati” mavzusidagi xalqaro ilmiy konferensiyada ishtirok etishi haqida ham ma’lumot berdi.
Tadbir doirasida Amir Temur hamda O‘zbekistonda yashab ijod qilgan buyuk olim va mutafakkirlarning Yevropa bilan madaniy-gumanitar aloqalarni rivojlantirishdagi o‘rni va ahamiyatiga bag‘ishlangan ko‘rgazma tashkil etildi. Leyden universitetida ochilgan mazkur ko‘rgazma joriy yilning 2-iyuniga qadar o‘z ishini davom ettiradi.
Izoh (0)