Vestminster universitetiga kirish hujjatlarini internet orqali taqdim etish mumkin bo‘ldi

Shu yildan boshlab abituriyentlar Toshkentdagi Xalqaro Vestminster universiteti saytida kirish imtihoni uchun onlayn tarzda ro‘yxatdan o‘tishi mumkin. Bu haqda TXVU ta’lim bo‘limi rahbari Aleksey Semyonov ICTNews nashriga ma’lum qildi.

“Avvallari viloyatlik abituriyentlar hujjat topshirish va imtihonga kirish uchun poytaxtga bir necha marta kelib-ketishga majbur bo‘lishar edi”, — dedi Semyonov.

Ushbu muammoga yechim topish maqsadida universitet tomonidan onlayn ro‘yxatdan o‘tish tizimi ishlab chiqildi. Uning yordamida uydan turib barcha hujjatlarni OTMga taqdim etish mumkin. Buning uchun tizimga hujjatlarning skanerlangan nusxalarini kiritish kifoya. Shundan so‘ng abituriyentga ruxsatnoma yaratiladi va imtihon kunigacha yoki shu kuni beriladi.

Imtihon natijalari elektron pochta orqali yuboriladi yoki ulardan tizimning o‘zida ham boxabar bo‘lish mumkin.